On parle de religion
Qui est d’estroicte gouvernance,
Et par ardant devocion,
Portent mainte dure penance ;
Mais, ainsi que j’ay congnoissance,
Et selon mon entencion.
Entre tous j’ay compassion
Des amoureux de l’observance.
Tousjours par contemplacion
Tiennent leurs cueurs raviz en transe,
Pour venir par perfection
Au hault Paradis de Plaisance ;
Chault, froit, soif et fain d’esperance
Seuffient en mainte nacion ;
Telle est la conversacion
Des amoureux de l’observance.
Piez nuz, de Consolacion
Quierent l’aumosne ; d’alegance
Or ne veulent ne pension,
Fors de Pitié ; povre pitance,
En bissacs plains de Souvenance,
Pour leur simple provision !
N’est ce saincte condicion
Des amoureux de l’observance ?
ENVOI
Des bigotz ne quiers l’accointance,
Ne loue leur oppinion,
Mais me tiens, par affection,
Des amoureux de l’observance.
Charles d’Orléans, Ballades, 1415-1440